Музиката го успорува стареењето

Музиката благотворно делува на мозокот, го успорува процесот на стареење бидејќи добро влијае на памтењето и моториката, наведуваат во неодамна објавената студија на француското здружение на автори и композитори.

„Музиката активира неколку мозочни региони“, изјавил професорот по невропсихологија Ерве Плател и додал дека долго се мислело дека музичарите имаат активен десен дел од мозокот, додека левиот е за говор.

Плател на основа на скенер и магнетна резонанца направил „мозочна картографија“ на музичари и на оние кои слушаат музика. Научникот навел дека двете хемисфери на мозокот се активни кај двете групи, а кај музичарите е пронајдена „хипертрофија (зголемување) на мозочниот регион на хипокампусот, кој игра клучна улога во памтењето“.

Хипокампусот се наоѓа во централниот дел на мозокот и е еден од ретките мозочни региони кој произведува нови неврони низ целиот тек на животот.

„Музиката го менува мозокот затоа што може да зголеми некои мозочни зони“, се наведува во студијата.