Помал број запишани студенти на туризам

Уписите на студенти за студиската програма за туризам на ФТУ во Охрид од година во година имаат тренд на опаѓање, исто како и на другите факултети, вели Цветко Андреески декан на Факултетот. Тенденциите на намален интерес за уписи траат неколку години наназад, но годинава таа појава е најдраматична, вели деканот Андреески.

„Најголемо потфрлање има на бројот на студенти на ФТУ на студските програми од областа на туризмот. На туризам се запишале 17 студенти, а вкупниот број студенти за хотелско-ресторански менаџери и гастрономија е 30 студенти што е многу мал број. Во споредба со минатата година таа бројка е половина“, информира деканот.

Андреески додава дека и покрај отварање работни места, порастот на бројот на туристички посети и ноќевања, зголемување на платите, интересот за студирање на студиската група туризам се намалува. Состојбата со интересот за студирање во услужниот сектор е слична и во соседните земји Србија, Црна Гора, Хрватска. На што се должи тоа потребна е сериоза анализа, напоменува деканот Андреески.

„Има повеќе причини кои ние претпоставуваме дека влијаат, но треба анализа за да излеземе со точни податоци. Претпоставуваме дека една е висината на платата, а втората е односот кон струката. Овие струки се потценети, без разлика на надоместокот кој се добива. На нашата ривиера готвач има 30.000 плата, но и покрај тоа, мал е бројот на наши студенти кои се одлучуваат за студиската програма гастрономија“, укажува Андреески.

Еминентни професори и претставници од стопанската комора учествуваат на 14-тата научна Меѓународна конференција на тема услужен сектор, во организација на ФТУ. На оваа тема се прифатени 58 трудови, од 87 автори, од 10 земји, а две пленарни предавања ќе имаат професори од Опатија и Нови Сад.