Триумф на Адел на Греми

Синоќа во Лос Анџелес се одржа 54-тото по ред свечено доделување на „Греми“ наградите, со кои им се оддава признание на најдобрите во музичката индустрија. Вечерта беше исполнета со многу музика, но и со сеќавања на големата музичка дива Витни Хјустон, која почина два дена пред настанот.

Адел беше најголем победник на вечерта и си замина дома со вкупно шест златни грамофони. 23-годишната Британка го изедначи рекордот на Бијонсе за најмногу освоени награди од женски изведувач. Гласовитата Адел ги освои наградите за Албум на годината (за албумот „21“), Музички запис на годината (за „Rolling in the Deep“), Песна на годината (за „Rolling in the Deep“), Најдобра поп соло изведба (за „Someone Like You“), Најдобар поп албум (за албумот „21“) и Најдобро музичко видео (Best Short Form Music Video за „Rolling In The Deep“).
Пресреќната Адел на сцената ѝ се заблагодари на својата мајка и на обожавателите кои придонесоа 2011 година да биде годината која ѝ го променила животот.

Зад доминантната Адел по бројот на освоени златни грамофони се најдоа Foo Fighters. Американскиот бенд прими пет награди, меѓу кои и наградите за Најдобар рок албум (за албумот „Wasting Light“), Најдобра рок песна (за „Walk“) и Најдобра рок изведба (за „Walk“).

Кание Вест доби четири награди, меѓу кои и наградата во категоријата Најдобар албум (за „My Beautiful Dark Twisted Fantasy“). Скрилекс доби три, а Тејлор Свифт и Си Ло Грин добија по две награди.

Постхумно на Ејми Вајнхаус ѝ беше доделена награда за Најдобра изведба на поп дуо/група за нејзиниот дует „Body and Soul“ со Тони Бенет. Наградата на сцената ја примија нејзините родители.
Свечената манифестација беше на некој начин посветена на Витни Хјустон и освен многу мили зборови и молитви, нејзе ѝ беше посветена и емотивната изведба на мега хитот „I Will Always Love You“ од Џенифер Хадсон.

{loadposition content9}