Недела за љубителите на шпанскиот филм во Охрид

Aмбасадата на Шпанија во Република Македонија, заедно со Министерството за култура, Кинотеката на Македонија и НУ Центар за култура „Григор Прличев“ Охрид , во Охрид организираат Ревија на шпански филмови.

Филмските проекции се во периодот од 20јули (понеделник) до 26 јули (недела). Ревијата содржи седум филмови од поновата продукција на шпанската кинематографија со различни жанрови. Меѓу нив има и неколку филмови кои се добитници на повеќе национални, но и меѓународни награди.

Ќе биде тоа можност за средба со филмовите на една од најдобрите европски кинематографии чии филмови,режисери, актери, сценаристи се врв и во светски рамки.

За тоа најдобро говорат успесите на шпанската кинематографија што таа ги постигнува на најпознатите филмски фестивали во Европа, но и ширум светот. Шпанската кинематографија може да се пофали со четири освоени оскари во категоријата најдобар странски филм и со дури 19 номинации за оскар во оваа категорија.