Запуштен видиковецот за посетители во НП Галичица

Посетителите на НП Галичица се соочуваат со запуштена локација кај излетничкиот видиковец. Местото за одмор во блиската  шума веднаш до управната зграда на паркот му треба реконструкција и пред се чистење.  Расфрланото ѓубре е одраз на нашата  некултура и низок степен  на чувство на одговорност кон околината, додека преполнетиот контејнер кој подолго време е неисчистен го покажува инфериониот однос на надлежните во паркот.

Се обидовме да дознаеме од НП Галичица кога ќе ги обноват искршената клупа и двата уништени инфо пултови, и кога ќе поднесат барање за чистење на локалитетот,но останавме без одговор.

Од ЈП Охридски комуналец не инфомираа дека во јануари не добиле  барање од НП Галичица да го исчистат паркот. Барање за чистење на територијата на паркот немале добиено ниту во 2015 година.

Франкофонската патека која го опфаќа и овој видиковец  е изградена во 2008 година. Последниот поголем зафат за чистење на паркот машински, но и рачно беше во  2009 и 2010 година во две фази. 

Тогаш беа исчистени 25.000 хектари од националниот парк, а беа изнесени 150 камиони со ѓубре. За овој голем зафат беа потрошени 10.000 евра пари од германската КФ банка.