Туристичката понуда во Охрид збогатена со првата бутик винарија Мал Св.Климент

Во првата охридска бутик винарија Мал Св.Климент љубителите на добрата капка може да дегустираат и купат високо квалитетно домашно вино. Виното е од првата регистрирана берба на грозје 2016. Произведени се неколку сорти вина од грозје од охридскиот реон. Покрај виното, во винаријата се нуди и храна. Дел од тимот е врвниот шеф од светска класа Синиша Салатиќ кој приготвува извонредни специјалитети. Се приготвуваат тестенини, салати, брускети со свежи зачини, вели охридскиот стопанственик Будимир Соколовиќ регистриран винопроизводител.

„Посебно ми е драго што ќе се зголеми туристичката понуда во градот. Деновиве има групи и други кои слушнале и дошле да дегустираат. Пресреќен сум што нашата понуда наиде на огромно задоволство и изнедување од квалитетот од спарувањето на храната и виното. Посетителите се воодушевени. Ова е бутик винарија со ограничено прозиводство и сите вина ќе се дегустираат и продаваат во винаријата“, напоменува Соколовиќ.

На винската листа има понуда од 5 сорти црвени, бели и розе вина. Во понудата ги има ракацители, едно од најстарите живи сорти во светот, памитот произведен по најстарата метода од античко време во амфора, охридското црно, вранецот, како и вранец зреен во специјални буриња. Интересна е понудата на памитот произведен по најстарата метода во глинени амфори вкопани во земја кои се наоѓаат во дел од винаријата Мал Св.Климент, кажува Соколовиќ. Додава дека тоа вино го нарекол и временска машина.

„Вкусот и мирисот на виното е тој што бил пред 2000 години. Во сите антички градови се пронајдени винарии со амфори, питоси, вкопани во земја. Тоа е атракција за гостите и кога ќе ги видат амфорите и кога ќе пијат вино ќе се вратат 2000 години наназад“, раскажува Соколовиќ.

Будимир Соколовиќ, сопственикот на винаријата и вила Мал Св. Климент, од 2016 година е регистриран винопроизводител до 30.000 литри вино согласно Законот за вино. Сите вина кои се во неговата винарија се одобрени за пуштање во продажба со серификати и анализи од надлежните институции и Министерството за земјоделство, шумарство и водостопанство.