Семејството Гигер ја понесе првата награда за најубаво украсен зимски двор

Првата награда за најубаво украсен зимски двор и балкон во Охрид ја понесе семејството Гигерови. Зимската, новогодишна бајка повторно царува во семејниот двор на Иванка и Бруно Гигер. Втората награда и припадна на Јована Бандиловска Јовановска , а третата заврши во рацете на Клаудија Арсенова. Семејството Гигер за украсување на својот двор одвојувале секој ден по 3-4 часа во текот на два месеци, а годишно издвојуваат и над 200 евра за купување на нови новогодишни реквизити.Ова не им е прва награда туку тие и се добро познати на охридската јавност. Со својот хуман гест ќе продлжат и овој пат и паричната награда ќе ја даруваат во хумани цели.

„ Како добитници на првата награда , како и остантите нагарди и овој пат средствата ќе ги донираме. Оваа година ќе ги донираме за г-динот Тачо кој беше на лекување и треба повторно да се упати на лекување,“ вели Иванка Гигер.

Локалната самоуправа со наградниот конкурс ги стимулира граѓаните да се вклучат во украсување на своите дворови и балкони за насекаде низ градот да се шири повесела празнична атмосфера. Игор Бежовски, секретар на општина Охрид, вели дека се радува што на овој конкурс покрај возрасните се вклучуваат и децата .

„Ние како општина се трудиме да го украсиме нашиот Охрид колку што можеме повеќе. Се сконцентрираме претежно на централното подрачје каде што најмногу претстојуваат туристите. Но, со поддршка и учество на граѓаните се украсуваат и останатите делови од градот па дури и  периферните делови. Нашиот град е убав, но вака се претвора во Новогодишна бајка“, напоменува Игор Бежовски секретар на општина Охрид.

На конкурсот, оваа година, пристигнале 8 пријави од охриѓани. Комисијата за избор на најубаво украсен зимски двор и балкон со фонд од 20. 000 денари ги распредели за првата награда 10.000 дена, втората 6000 и третата 4000 денари.