45 годишен охриѓанец кој е хоспитализиран поради Ковид 19 на клиниката Филип Втори има потреба од крвна плазма од донатор со крвна група Нулта позитив кој ја прележал болеста. Се почести се ваквите апели на социјалните мрежи за потреба од крвна плазма. Состојбата на некои од пациентите брзо се влошува, а од друга страна донирањето и испитувањето на крвна плазма е сложена постапка. Од Институтот за трансфузиологија во Скопје апелираат излекуваните од заразната болест да не чекаат на поединечни апели туку да донираат плазма порано кога ќе се почуствуваат подобро за да помогнат во спасување на нечиј живот.
Охриѓани и стружани излекувани од ковид 19 може да се пријaвуваат во Институтот во Скопје и на трансфузиолошките центри низ државата. Институтот организира акција за земање крвна плазма во местото на живеење на лицето кое донира или со сопствено возило организира превоз до Скопје. Лицата треба да се на возраст од 18 до 60 години и да немаат симптоми најмалку 21 ден. После трет негативен тест се утврдува концентрацијата на антитела во крвта.
Антителата од крвта на оздравените пациенти, се внесуваат во телото на болно лице, кое така добива способност полесно да се справи со тешката форма на болеста Ковид-19.
