На празникот Илинден Фестивалот Охридско лето донесува двојна програма

Концерти на два сопрани и пијано се на вечерашниот репертоар на Фестивалот Охридско лето. Во 20.30 во Света Софија настапуваат познатите сопранистки, сестрите-близначки Билјана Стафансон и Љилјана Јовановиќ, во придружба на врвната македонска пијанистка Марија Вршкова. Концертот ќе го одржат во рамките на Шведската вечер на фестивалот.
Близначките Стафансон и Јовановиќ се колоратурни сопрани кои публиката ги памети како „чудо од деца“ од времето кога на 9-годишна возраст на телевизија го исполниле дуетот од Моцартовата „Волшебна флејта“. Двете честопати настапуваат заедно на европските сцени пеејќи на повеќе јазици. Нивниот богат концертен и оперски репертоар содржи дела од Белини, Шопен, Доницети, Моцарт и Верди, како и дела од нордиски и други европски композитори. Нивните изведби се високо оценети од страна на критиката, особено нивната брилјантна интерпретација, музикалност и извонреден висок регистар.
По завршување на концертот на сопранистките, во 22 часот, како дел од музичката програма на „Охридско лето“ ќе настапи младата пијанистка Сандра Јакоповиќ од Србија. Јакоповиќ е родена на Кипар, а започнува да свири пијано на 5-годишна возраст. Дипломира на Факултетот за музичка уметност во Белград. Освојува бројни награди и признанија од кои едно од најзначајните е „Гран При“ на натпревар во Женева кога имала само 10 години.