На охридските улици возачите често не даваат предност на брзата помош

Честа е појавата на охридските улици возачите на моторни возила да ги игнорираат вклучените ротациони светла и сирени на возилата за брза помош. Лекарите од итната медицинска помош посочуваат дека се соочуваат со непријатни попречувања во ургентната задача која имаат и покрај уредно вклучената сигнализација.

„ Најчесто се работи за лица кои истовремено управуваат моторни возила и зборуваат на мобилен телефон. Апелираме секогаш да се даде првенство на возилата на прва помош кога има вклучена ротација или сирена. Утре може да се случи да се работи и за нас и не е во ред некој да не ни даде првенство на минување и да не стигнеме на време каде што е потребно“, посочува д-р Горан Симјаноски раководител  на медицинската  итна помош.

Лекарите укажуваат дека оваа ситуација е резултат на непримерно однесување на помлади луѓе. Тие возат и зборуваат на мобилен телефон ,а при тоа ни слушаат ни гледаат што се случува на сообраќајниот коловоз.

„ Може да речам дека секогаш кога излегуваме на итен повик 1 до 2 возачи ќе се најдат со кој имаме проблем во разминување, преминување или почитување на првенство на минување“, укажува д-р Симјаноски.

Горан Симјаноски, раководителот на итната медицинска помош, вели дека досега официјално не се обратиле до полиција, но неформално разговарале  на оваа тема. Д-р Симјаноски нагласува дека е потребна поголема едукација и подигање на сообраќајната култура на населението за давање на предност на минување на возилата на итна медицинска помош бидејќи од тоа често зависи животот на некој наш сограѓанин.