Охрид се попривлечен за Молдавските туристи

Зголемено присуство на Молдавски туристи се очекува во 2022 година на охридското крајбрежје. Од туристичкиот сектор очекуваат покрај туристите од Руската Федерација, Полска и Украина да се зголемат посетите на туристи и од Молдавија. Заинтересираноста на овие туристи за посета на нашето крајбрежје се потврдува со посетата на 15 тур-оператори од Молдавија. Тие се сретнаа со Македонски претставници од туристичкиот сектор и се надевам дека хотелиерите и тур-операторите ќе воспостават соработка и конкретни договори, рече Јаневски, директор на Агенцијата за поддршка и промоција на туризмот.

Од 2022 до 2025 година ние се повеќе очекуваме туристи од Источна Европа, од Руската Федерација, Полска и Украина, па и од Белорусија на подолг рок. Тие пазари се се повеќе заинтресирани за Охрид и Македонија.Тоа се докажа со воспоставување на авио линии од Москва, Санкт Петербург, Киев, Скопје – истакна Јаневски.

Молдавските тур-оператори ја прошируваат својата програма и наместо како дел од кружна автобуска тура Албанија-Македонија, Скопје и Охрид ќе влезат како независна понуда во каталозите на тур-операторите од Молдавија, по детектираниот интерес за посета на Охрид и Скопје од страна на нивните туристи.

Агенцијата за промоција и поддршка на туризмот се обидува да се прилагоди на промените наметнати од пандемијата со Ковид 19. Досегашните  посети покрај Охрид и Скопје ќе вклучат и посета на зимски ресорти, хотели, туристички локалитети. Интересот е насочен и на екскурзии во Тетово, Маврово, Струга, Вевчани и Битола.

Очекувам отворањето на овие пазари да донесе подобри туристички резултати, а ние ќе продолжиме да работиме на квалитетна промоција со цел да привлечеме посакувани профили на туристи – изјави Јаневски, директорот на Агенцијата за поддршка и промоција на туризмот.