ОИК: Завршени се техничките подготовки за работата на Избирачките одбори

Завршени се сите подготовки за нормално функционирање на избирачките одбори на сите гласачки места во општина Охрид , информира Климент Камнароски, претседател на ОИК. Поделени се 880 решенија на претседатели, заменици претседатели, членови и заменици на членови кои се во составот на избирачките одбори. Од претходниот состав на ИО 40 лица биле иземени и на нивно место се поставени  нови членови од страна на ДИК“ , кажува Камнароски.

„Има промени на луѓе кои се иземени од работни позиции кои заминале в пензија, се на боледување или се со хронични заболувања кои се ослободени од членови и претседатели на ИО. Тие лица се заменети и се поставени нови лица од ДИК по случаен електронски избор“, информира Камнароски.

Во врска со тоа дали има ослободување на медицинскиот персонал од изборниот процес, Камнароски вели дека тие остануваат и понатака на позициите на кои претходно биле избрани. По насоки од ДИК тоа се претседатели на ИО, заменици, членови и заменици на членовите од редовите на здравстевните работници и Јавните здравствени установи, избрани по случаен избор, посочува Камнароски, нo има промени само во одредени случаи.

„За претседатели, заменици претседатели и членови и заменици на членови на ИО кои користат мерки на влада и не одат на работа, односно работат од дома остануваат членови и заменици во ИО. Освен лицата кои лично поднеле барање за иземање заради хронично заболување со дијагноза опфатена на листата објавена на интернет страна според Министерсвото за труд и социјална политика“.

Од 1 јули започнуваат обуките на Избирачките Одбори кои ќе бидат одржани од страна на обучувачи од ДИК. Од ОИК ги очекуваат и протоколите според кои треба да се знае како ќе се спроведува гласањето на изборниот ден на 15 јули.