Општината ќе постапува и на објектите на шеталиштето Кеј Македонија

Општината ќе става ред и на кеј Македонија на објектите кои се наоѓаат вдолж шеталиштето. Голем број објекти ги прекршиле издадените одобренија од општината, вели градоначалникот Константин Георгиески, за ситуацијата и во овој дел од атрактивното крајбрежје.

„ Таму состојбата е лоша како и секаде. Станува збор за полулегални објекти. Таму е издадено одобрение за поставување на урбана опрема, а урбана опрема според дозволите кои ги добиле од општина и за кои плаќаат надомест значи некаде настрешница, чадори и маси, а никаде не станува збор за застаклување, физичко затварање, а некаде има дури и подно греење“, посочува Георгиески.

Станува збор за работа на полулегални објекти кои засега немаат добиено решенија за да ги одстранат нерегуларностите согласно издадените одобренија за поставување на урбана опрема. Тоа е процес кој ќе стигне и до нив, велат од општинскиот инспекторат.

„ Тие се плаќачи на закупнина за земјиштето на општината, но се нелегални терасите и ќе се постапува и таму“, додава градоначалникот.

Инаку, од објекти кои се евидентирани во општинскиот регистер на бесправно изградените објекти од 409 -те не се само објекти туку и тераси, скали, огради. Институциите од 2003 година во општина Охрид не срушиле нити еден столб и дозволиле да се изградат и да се напластат голем број нелегални предмети кои завршиле само во евиденцијата на дневниците на општинскиот инспекторат.