Младите се почесто го избираат велосипедот како превозно средство низ градот

Голем број на учесници меѓу кои граѓани и ученици, денес зедоа активно учество во велосипедското дефиле што се одржа низ градските улици. Младите луѓе се почесто избираат да возат велосипед низ градот, а со тоа покажуваат дека се пријателски расположени кон животната средина, а мислат и на своето здравје.

Организатор на дефилето е општина Охрид, вклучувајќи се и оваа година во одбележување на Ден без автомобили во рамките на Европската недела на мобилност. Во велосипедското дефиле учество зеде и Ристо Николески, заменикот градоначалник на Охрид. Открива дека вози велосипед често кога нема обврски при разнесување на децата на училиште и во градинка. Вели дека од мали нозе ги мотивира и своите деца да возат велосипед. Напоменува дека градот нуди идеални услови за возење велосипед, а признава дека инфраструктурата за возење велосипед низ градските улици може да биде и подобра. Препорачува на сограѓните што почесто да го избираат превозното средство на две тркала.

„ Во секојдневниот живот давам предност на велосипедот. Охрид е градот на сонцето со многу сончеви денови и може да се користи велосипед. Корисно е по здравјето , а истовремено е корисно и во обавување на секојдневните обврски при пазарање, плаќање сметки и доаѓање на работа, се е полесно да се обави со велосипед. Градот е мал и брзо се стигнува од едно место до друго“, вели Николески.

За сите учесници на дефилето општината додели вредни награди. Покрај заштитните кациги за велосипеди, ролери , за најсреќниот учесник на јавното извлекување главната награда беше велосипед.