Проаква ќе поднесе апликации за два проекти финансирани од ЕИБ

Водоснабдувањето на градот ќе се подобрува со два големи проекти. МЈП Проаква ќе го искорити повикот на министерот за транспорт и врски за аплицирање проекти со кои може да се искористат средствата од Европската инвестициска банка за подобрување на водводната и канализационата мрежа во општините во земјава. Владимир Алексијоски дир. на МЈП Проаква појаснува дека со првиот проект за преземање на водите од Свинишките извори,тежок 5 милиони евра , а изготовен заедно со Градежниот факултет од Скопје, ќе се реши водоснадувањето на селата од поранешната Коселска општина и на градот.

„ Со проектот е предвидено да се снабдуваат со вода сите населени места од поранешната општина Косел кои во моменетов имаат проблеми со воdoснабдувањето. Голем дел од нив сами го одржуваат водоводниот систем и имаат проблем со квалитетот на водата. Сите населени места ќе бидат снабдени со вода. Градот Охрид по гравитационен пад е планирано да добива 100 l/sec  во централниот резервоар“, посочува Алексијоски.

Пари се потребни и за замена на филтрите на пумпната станица кај Метропол. Со нивна замена ќе се подобри квалитетот на водата со која сега се снабдуваат охриѓани.

„ Претставниците од израелската фирма Амијат беа изненадени како филтрите стари 30 години се сеуште во функција. За промена на филтрите имаме изготвено програма во висина од 240.000 евра и бараме средства за реализација на истиот кој е од големо значење за квалитетот на водата од пумпната станица кај Метропол“, вели Алексијоски.

Покрај овие проекти со кои ќе се бараат средства преку Министерството за транспорт и врски во тек се и активности за кои веќе се одобрени средства. Наскоро ќе отпочнат зафати за поставување и регулирање на контролни шахти за кои се одборени грант во висина од 2 милиони денари од Министерството за животна средина. Докрајот на оваа година ќе се интервенира на промена на пумпите и електриката на пумните станици во Метропол, Трпејца, Љубаништа и Св. Наум со грант од 20 милиони денари средства добиени од Агенцијата за рурален развој аплицирано преку Локалната самоуправа.