Кубанскиот пијанист Леонел Моралес вечер на Охридско лето

Леонел Моралес критичарите го опишуваат како изведувач со брилијантна техника, леснотија, елеганција и неверојатна прецизност во свирењето.

Секој негов настап е испратен со громогласно ракоплескање и воодушевување од публиката низ целиот свет. Дипломирал на Универзитетот во Хавана, под менторство на пијанистот Франк Фернандез, инаку студент на еминентниот руски пијанист Виктор Мерзанов, следејќи го методот на традиционалната руска школа. По завршувањето и на своите постдипломски студии, Моралес се сели во Шпанија, каде што почнува активно да настапува и да учествува на голем број национални и интернационални натпревари, на кои освојува значајни награди. Настапувал во речиси сите големи музички центри во светот, а значајни се и неговите мајсторски школи што ги одржува таму. Еден од поинтересните курсеви, е оној на кој Моралес ги анализира и ги интерпретира сите 32 Бетовенови сонати. Во текот на својата кариера, настапувал со некои од најзначајните оркестри во светот, како Шпанскиот национален оркестар, Симфонискиот оркестар на Билбао, Симфонискиот оркестар на Хамбург, Симфониските оркестри на Истанбул и на Анкара, Берлинската филхармонија, Варшавската филхармонија и др. Соработувал и со голем број реномирани изведувачи и интернационално признати диригенти, меѓу кои Виктор Пабло Перез, Макс Валдес, Михаил Јуровски, Александар Рабари, Жак Мерси, Франц Крејгер и многу други.

Моралес пред фестивалската публика ќе се претстави со дела на Бетовен, Рахманинов и Стравински. Концертот е во црквата Св. Софија со почеток во 21 часот, а цената на влезницата изнесува 300 денари.