Маса повторно ќе се тестира со Ф2007

Фелипе Маса повторно ќе седне во шампионскиот болид Ф2007.

Бразилецот имал желба сезоната да ја заврши со уште еден тест со болид на Ферари, а тимот од Маранело му излезе в пресрет и му дозволи да има уште една проба со нивниот болид. Не е точно прецизирано кој ден ќе се одржи тестот, но познато е дека на располагање ќе биде шампионскиот болид од 2007 година опремен со специјални гуми.

Тестот веројатно ќе се одржи на патеката Муџело, но најголем проблем е дождот кој ќе биде присутен во таа област деновиве. Разговорот со претпоставените се одржал за време на Божиќниот фестивал во Маранело, каде Маса заедно со тест возачите Лука Бадоер и Марк Хене делел подароци на вработените. – Сакав да влетам во Формула 1 болид пред крајот на годината, па максимално го искористив престојот во Маранело. Сакам да се заблагодарам на Ферари за овој подарок, – изјави Маса. По опоравувањето од тешките повреди здобиени во Унгарија летово, Маса имаше еден тест со Ф2007 и еден со овогодинешниот болид на Финалето на Ферари одржано во Валенсија. Периодов настапуваше на две картинг трки, при што во првата имаше една поединечна победа и севкупно второ место, а забележа победа на Грања Виана 500 милји во Бразил. Позитивниот период по повредата го одбележа и неодамна добиениот статус на родител, што му донесе радост на приватен план.

{loadposition content9}