Попреченоста не е препрека на патот кон успехот

Над педесет лица со посебни потреби од струшко изминативе години се вработени. Стекнале социјални и работни вештини за самостоен живот и егзистенција. Денес се работоспособни и корисни во општеството.

Васко Јовчески од село Луково и Игор Шајноски од Струга се двете лица со попреченост, чиј работен статус е решен. Васко живее потполно сам и се грижи за себе, откако починале неговите родители.

Сам готвам, земам пари плаќам сметки и за јадење и апчиња – вели Васко Јовчески, лице со попреченост.

Игор Шајноски е првиот и најдобриот продавач на списанието „Лице в лице” во земјава. И тој е потполно самостоен.

Со драга волја работам за да можам да остварам нови работни вештини – вели Шајноски, лице сo попреченост.

Попреченоста не е препрека на патот кон успехот. За тоа е доказ првиот театарски режисер со хендикеп во последните педесет години кој дипломирал со просек 10, стружанецот Даниел Шикоски.

Секогаш можеме да успееме ако ние сме упорни и решителни во нешто да успееме – вели Даниел Шикоски лице со попреченост.

Центарот „Порака Нова“ 18 години се грижи за своите штитеници да бидат самостојни и работоспособни.

Ние посредуваме при вработувањето на лицата со попреченост во заштитните друштва во Струга. Имаме многу добра соработка освен што ги поврзуваме со самите семејства вршиме и директно вклучување во самиот процес. Нудиме и менторирање – вели Стефан Малески, координатор во „Порака Нова”.

Традиционално пред Новогодишните празници Лице в лице продава честитки дизајнирани од познати македонски уметници за поддршка на уличните продавачи.

Честитките се 12 мотиви направени од македонски уметници. Честитката чини 50 денари, а половина од заработката оди за продавачот, бидејќи овде кај нас Игор е вработено лица половина од овој приход го поддржува неговото вработување во нашата организација „Порака Нова“ – вели Малески.

Од „Порака Нова“ апелираат што повеќе фирми во својот работен процес да вклучат лица со попреченост, бидејќи токму овие лица умеат да бидат вредни и успешни работници.

Новинар : Соња Рилковска