КУД „Дримкол“- Вевчани на Меѓународен фестивал во Грција

КУД „Дримкол“ од Вевчани преку својот детски и младински фолклорен ансамбал овие денови ја презентира Македонската култура и традиција на Меѓународниот  фестивалот за музика и танци „Музика и море“ кој се одржува во туристичкото крајбрежно место Паралија.

Покрај настапите во официјалната програма на фестивалот кој се одвива во анфитеатарот во Паралија, младите членови на Дримкол ја воодушевија публиката и во туристичките места: Катерини, Олимпик Бич.

Организаторот задоволен од Вевчанци, синоќа им довери 15 минутна програма на свеченоста по повод доделувањето на Гранд При наградата на фестивалот.

Во рамките на овој фестивал се организира и Балканска фолклорна вечер во Атина на која Македонската култура и традиција ќе ја представува првиот фолклорен ансамбал на „Дримкол“.

КУД „Дримкол“ од Вевчани со оваа турнеја заокружува уште едно успешно работно лето во кое реализира: 50 Македонски фолклорни вечери за гостите од Холандија кои престојуваа во Струга и Охрид, 5 гостувања низ државата во рамките на Летниот културен бран преку Министерството за култура на Р.М, учество на  Балканскиот фестивал во Охрид и фолклорните фестивали во Битола и Велес, реализација на Фестивалот за народна култура „Пображење“- Вечани.
 
За есенскиот период од „Дримкол“ најавуваат подготовка и реализација на самостоен концерт во Македонскиот народен театар во Скопје кој ќе го реализираат во месец Ноември и подготовка за Традиционалниот новогодишен концерт во Вевчани.