Изградбата на современ ски-центар на Јабланица се коси со плановите за заштитата, кои претендендираат планината да биде прогласена за Национален парк.
Ова е ставот на активистите, откако Агенцијата за промоција и странски инвестиции го презентираше проектот за изградба на скијачки патеки на планината Јабланица со должина од 85 километри, 21 километар скијачки лифтови и два резервоари за производство на снег.
Во проектот е предвидено изградба на 10 хотели, а вкупната вредност на инвестицијата е околу 320 милиони евра.
Дефиницијата за таков простор е дека се забранети, недозволиви било какви градежни активности, урбанизација, злоупотреба или употреба на природни ресурси и други активности надвор од рекреативното и спортското еколошко користење на тој предел – вели Никола Кукунешоски, граѓански активист.
Наспроти бројните ски центри изградени во европските држави во заштитени подрачја, активистите велат во земјава најголема закана е узурпацијата на атрактивните локации.
Нивната свест и нивните закони таму поинаку ги регулираат нештата во тие држави. Нас овде не плажи токму безаконието и можноста да се спречи било каква узурпација или девастација на тој потег, затоа час поскоро ни е потребен тој статус на заштитено подрачје како Национален парк – додава Кукунешоски.
Градоначалникот на Струга оствари средба со Агенцијата за промоција и странски инвестиции и рече ски центарот е многу важен проект за општината, но најави консултации со невладините, екологистите, локалната заедница и бизнис секторот.
Во 2013 година беше изработен проект за изградба на ски центар, викенд населба и хотели кај месноста Јанков камен над Вевчани, беше изготвена и физибилити студија и мастер план, но до денес не се реализира.
Новинар : Соња Рилковска
