Актуелна трговијата со дрва на „црно“

Дрвокрадците ги соголуваат шумите на Јабланица. Жители на соседна Албанија преку границата, поддржани од мештаните во околните села, постојано вршат нелегална сеча. Трговијата со дрва на „црно” посебно е актуелна пред стартот на грејната сезона.

Полицијата во изминатиот период одзеде голема количина дрвна маса, која нелегално се транспортирала од планинскиот појас на патот Струга-Дебар. При секоја заплена на дрвокрадците им се одземаат коњи, џипови, камиони, алат за сеча и огревното дрво.

Со поставување на пунктови и заседи и прегледи на терен и сите активности резултирале со пронаоѓање на девет лица кои што вршеле нелегална сеча пустошење шуми тие се затекнати при товар на пресечената дрвна маса на коњи и транспорт до камиони и други моторни возила со кои се транспортираат нелегално – вели Стефан Димоски портпарол на СВР Охрид.

Поголемиот број на дрвокрадците се државјани на соседна Албанија кои влегуваат нелегално преку Јабланица.

Од овие девет лица, осум се албански државјани и еден е од земјава. Она што е карактеристично е дека ОВР Струга има поднесено соодветни пријави против повеќе физички, но и правни лица – додава Димоски.

Активистите од Здружението за екологија „Натура лаб” од Лабуништа последниве две години постојано алармираат за соголувањето на шумите на Јабланица. Загрижени, велат пустошењето на шумите им предизвикува поплави и опасност од свлечишта. 

Новинар Соња Рилковска