Нема миење на возила на јавни места

Повеќе нема миење на возила на јавните места. Доколку сопствениците сакаат својот автомобил да го измијат тоа ќе мора да го сторат во својот двор или во пералните.  Ако досега пракса беше возилата да се мијат  по плажите и кејот на реката Црн Дрим,  во иднина нема да биде така. Инспекторите за заштита на животната средина, најавија засилени акции за спречување на ваквите појави. По реакциите на граѓаните на Струга, кои покренаа иницијатива за злопотреба на природата, со  миење на автомобили и перење на покуќнина на јавни места, надлежните решија да превземат сериозни мерки.

За спречување на ваквите појави, инспекторите за заштита на животната средина низ градот ќе постават табли, со кои ќе се предупредуваат граѓаните да не ги мијат автомобилите на јавни места, ниту пак да ја перат покуќнина на истите. Таблите веќе се во изработка, се очекува да се постават за 10-тина дена.

„Таблите освен во градот, ќе им бидат поставени и по селата. Ќе им дадеме и на претседателите на месните заедници на селата кои се во близина на езерото и реките. И таму ќе внимавеме да се почитува законот“-вели Митко Кортукоски, инспектор за заштита на животната средина.

Освен што ќе бидат поставени информативните табли, инспекторите најавија дека постојано ќе патролираат во градот. Доколу се затекнат граѓани кои не се придржуваат на законската обврска ќе им бидат изречени парични казни, информира инспекторот. Согласно законот за јавна чистота и оној за заштита на животната средина, глобата ќе изнесува од 45 евра нагоре. Акцијата ќе биде поинтензивна за време на летниот период.

{loadposition content9}