Зоран Ногачески денеска од ОИК на Дебрца го доби Уверението за избран градоначалник на Општината Дебрца, со што официјално го започнува новиот мандат за периодот 2021 до 2025 година, а врз основа на волјата на граѓаните изразена на Локалните избори.
Ногачески и овојпат им се заблагодари на граѓаните на општината за искажаната поддршка и истакна дека сега има уште поголема обврска и одговорност.
Подавам рака и ги повикувам сите граѓани да ни се придружат заедно да продолжиме да го градиме нашиот заеднички дом, нашата Дебрца. Убеден сум дека на тој пат ќе имаме добра соработка и со новоизбраните членови на советот на општината, на кои им го честитам изборот – изјави тој.
Ногачески кој беше градоначалник на Дебрца и изминатите четири години како кадар предложен од СДСМ, кандидатурата за вториот мандат ја поднесе како независен и во вториот круг од Локалните избори ја доби поддршката на мнозинството граѓани.
Многу од одлуките што ќе ги носи ќе зависат и од составот на идниот состав на Советот на Општина Дебрца што според резултатите на Локалните избори ќе биде составен од по четири претставници на коалициите предводени од СДСМ и од ВМРО-ДПМНЕ, еден советник од коалицијата ДОМ-ЛДП, како и по еден советник од избирачките групи Димче Андрески и Александар Николоски.
