Загина сопатник на мотор, во Пештани

Загина сопатник на мотор. Синоќа околу 1 часот после полноќ, на патниот правец Охрид – Св. Наум, на влезот од Пештани, се случи тешка сообраќајна незгода. На самото место на несреќата едно лице почина, а возачот Владимир Никулески 37 год, се здобил со тешки телесни повреди и искршеници и веднаш бил префрлен во Охридската Специјална болница за ортопедија и трауматологија Св. Еразмо.

На местото на несреќата сеуште имаше делови од моторот марка „Јамаха ЛС 1100“, со скопски регистерски таблички, две локви со крв, делови на облека патики, очила, како и расфрлан материјал ракавици, најверојатно од вештачењето на стручните тимови и медицинските екипи. По се изгледа немало очевидци на несреќета, бидејќи мештаните од соседните куќи воопшто не слушнале ништо, излегле само кога дошла полицијата и брзата помош. Дел од пештанци воопшто не знаеја за немилиот настан, прв пат слушнаа од нас, но кратко прокоментираа дека на тој дел од патот, поточно таа кривина била многу опасна и тука асфалтот лизгал поради водата која постојано тече и го влажни патот. Настанот е потврден од МВР. Стручните тимови сеуште работат на откривање на деталите за незгодата а врз телото на починатиот ќе се врши обдукција. Увид на лице место извршен е од страна на СВР Охрид, ЗЈО и Истражен судија. Марко. К кој трагично загина синоќа беше на 27 годишна возраст и беше син единец на колега, новинар.

 {loadposition content9}