Во градов имаме ново зелено пазарче

На просторот во близина на кружниот тек кај охридската болница, никна мини пазарче. Десеттина продавачи секој ден тука ги нудат своите производи. Има од се по нешто, пиперки, патлиџани, грозје, тиква, костени, ореви и друг сезонски зеленчук и  овошје. Продавачите велат дека ова место го избрале за да ги продаваат своите производи поради тоа што е многу фреквентно и има доста купувачи, а и им е поблиску до нивните домови.

И оние кои купуваат зеленчук и овошје на ова импровизирано зелено пазарче се задоволни од понудата и цените по кои тоа се продава.

Од пред една година ЈП „Градски пазар“ токму на ова место постави две тезги за да можат продавачите на нив да ги изложуваат своите производи, но тие тезги сега се веќе претесни за сите кои се заинтересирани да продаваат тука. Производителите бараат од градски пазар да постави уште неколку тезги и да го уреди просторот како навистина би заличил на едно мини пазарче. Вака зеленчукот и овошјето буквално се продава на улица на некои импровизирани тезги кои не ги задоволуваат минималните хигиенски услови па многу често дел од минувачите па и од купувачите реагираат велејќи дека производите се квалитетни, но условите во кои се продаваат не се соодветни. Директорот на ЈП „Грдаски пазар“, Тони Коталески кажува дека и тие ја увиделе потребата од поставување на повеќе тезги на овој потег. Но објаснува дека во план им е прво да го уредат просторот, да го бетонираат па потоа да ги стават тезгите. Инаку Градски пазар тезги постави и кај некогашниот Мини маркет, но интерес за таму да се продава речиси и да нема.