Утре ќе се одржи изложбата „Низ детските очи 2“

Втора година по ред се одржа летната сликарска школа „Пробај уметност“, која траеше осум недели и во неа учествуваа преку триесет деца. За разлика од лани, оваа година со делумна финансиска помош од Општина Охрид и донации од граѓани, беше овозможено 10 деца од семејства од ранлива категорија да бидат дел од школата, велат организаторите.

Како завршен дел од проектот, планирана е и изложба, насловена „Низ детските очи 2“. На изложбата ќе бидат поставени 84 слики од 21 автор. Сите слики се работени во текот на сликарската школа, а авторите се деца на возраст од 5 до 12 години.

Изложбата ќе се одржи на 26 август (четврток), на плоштадот Долна Порта, кај хотел „Александрија“, со почеток во 17:00 часот. Истата е од продажен карактер, а средствата кои ќе бидат собрани од продажбата на сликите ќе бидат наменети за децата.