Штрајкувачки одбор гимназија: „Во понеделник ќе има штрајк“

Од понеделник  во охридската гимназија ќе штрајкуваат професорите кои ја поддржаа одлуката на СОНК за штрајк во образованието, вели Ристо Николески, член на штрајкувачкиот одбор на синдикалната организација при гимназијата „Св.Климент Охридски“. Професорот Николески, кој денес беше надвор од градот, во телефонски разговор за ТВМ открива дека тие законската процедура за пријавување на штрајкот ја испочитувале со носење на одлука на одборот за стапување во штрајк. Додава дека одлуката вчера, пред назначувањето на новиот директор била доставена и потпишана од досегашниот вршител на должноста директор на гимназијата, Вера Јовческа.

„Дека штрајк ќе има, ќе има штрајк и тоа е договорено и одлучено на состанокот кој се одржа во петокот во 13 часот, меѓу смените. Одлуката беше едногласно од колегите поддржана, е сега бројноста на тоа колку колеги ќе го поддржат штрајкот не ја знаеме, но синдикалната организација при ОСУ „Св.Климент Охридски“ даде поддршка да излезиме на штрајк и да го поддржиме штрајкот од централата.“-вели Ристо Николески, член на штрајкувачкиот одбор при ОСУ „Св.Климент Охридски“.

Николески за одлуката за стапување во штрајк потенцираше дека не е политички мотивирана, туку дека станува збор само за остварување на правата на професорите. Тој смета дека и голем дел од професорите кои нема да штрајкуваат, морално ги поддржуваат штрајкувачите. Сепак не можеше да прецизира колкав дел од колегите кои гласале за стапување во штрајк, во понеделник ќе штрајкуваат.

„Да не кажувам точна бројка, или не ни знам точна бројка бидејќи можеби од тие кои се пријавија вчера дека сакаат да штрајкуваат, по вршење на притисоци можеби и ќе се откажат, да не штрајкуваат. Постојано имаме притисоци ние, тоа се ситни политички притисоци, ова е борба за демократија, не е за ситни политички поени, туку си ги бараме правата, основни човекови права се ова. Казнување на професори го нема никаде во светот и тоа треба да му е јасно на цел Охрид и цел Охрид треба да ни даде нас поддршка.“-рече тој.

Николески вели дека штрајкувачкиот одбор ги има добиено штрајкувачките материјали, односно соодветни плакати за излегување на штрајк. Инаку Синдикатот за образование и наука уште на почетокот на месецов донесе одлука од 20 јануари да започне генерален штрајк поради неисполнување на барањата за зголемување на платите, како и укинување на казните на наставниците воведени врз основа на екстерното оценување.

{loadposition content9}