Русите заинтересирани за Охрид како туристичка дестинација

Отворањето на авио линија Москва – Скопје отвора нови туристички и инвестициски можности за Охрид и Македонија. Русите се заинтересирани да летуваат на брегот на Охридското езеро, но и да инвестираат во туризмот. Интересот за Македонија, како туристичка дестинација е голем, вели Ина Жарова претседателка на Фондот за руска и македонска соработка и генерален директор на кампањата “Македонски дом” од Москва.

-Од 1992 година немаше директна линија за Москва – Скопје. Оваа нова линија ќе донесе нови можности за туристи, за развивање на меѓусебни културни врски, економски врски и воспоставување на добри услови за бизнис и за македонската и за руската држава“, вели Жарова Ина, претседателка на Фондот за руска и македонска соработка.

Македонија е привлечна и за бизнис, економска соработка и инвестиции. Руски бизнисмени пројавиле интерес, но и сериозни бизнис планови за инвестирање во земјава во повеќе сектори, информира Жарова. Во ноември во Охрид ќе се одржи меѓународен конгрес со учесници од бизнис сферата, директори и раководители на големи компании со цел што побрзо развивање на економската соработка меѓу двете земји.

-Има голем интерес од руски инвеститори за развивање на бизнис во Р.Македонија. Тој процес е во тек, за да развиеме врски за двете држави. Интерес за соработка има во неколку сфери и во бзнис и во туризам. Потоа ќе видиме во која сфера ќе биде најголем интересот и развивање на нашите врски.-додава Ина Жарова претседателка на Фондот за руска и македонска соработка.

Бизнис конгресот се најавува дека ќе се одржи од 1- ви до 6-ти ноември во Охрид, а учество ќе земат бизнисмени од 10 држави. На него ќе се разменат искуства и ќе се прецизира во кои бизниси конкркетно ќе се инвестира, покрај туризмот како еден од најпривлечните сектори.

Новинар : Соња Рилковска