„ПРВИН ЌЕ МЕ ЗЕМЕШ, ПОСЛЕ ЌЕ МЕ … ” пред охридската публика

Претставата  „ПРВИН ЌЕ МЕ ЗЕМЕШ, ПОСЛЕ ЌЕ МЕ … ” во режија на Ѓорѓи Ризески ќе гостува во Охрид,  во среда,  на сцената на охридскиот театар. Станува збор за независен проект,  во продукција на „ТЕАТАР ПРОВОКАЦИЈА” од Скопје  кој трета сезона се изведува пред преполни салони на сцената на „ТЕАТАР КОМЕДИЈА”. Реалното шоу „ Осакатени души“ има над 50 изведби во матичната куќа , Театар Комедија и низ градовите во државата. Од досегашното искуство режисерот Ризески  споделува дека македонската  публика е гладна за жанрот комедија.

„Има желба за комедија. Немало град, а да нема интерес за комедија , а досега сме гостувале 15 пати надвор од матичната куќа. Во овие времиња во кои живееме има повеќе интерес, а ние како уметници сме среќни  кога ќе ни се наполни салата на претставата , настрана од митинзите “, вели режисерот Ризески.

Џота и Кети се ликовите од реалното шоу „ОСАКАТЕНИ ДУШИ”. Двајцата во пододминат лимит на години за мажење-женење, со различни животни стории кои оставиле болни траги врз нивните животи. Тие имаат  спротиставени очекувања кои ја прават  оваа средба со многу конфликтно-комични ситуации кои во одредени моменти водат до точка на безизлезност. Претставата е специфична и по тоа што актерската игра има интеракциски однос со публиката и секоја нова претставата е различна од претходната, напоменува режисерот на претставата Ризески..

„Секаде е различно. Од 50 претстави нема 2 исти изведби. Има најразлични предлози од едноставни до поригорозни ситуации. Публиката ужива и се соживува во улогите на двајцата актери  кои се во рандеву, а публиката им ги крои плановите и судбината. Интересно е тоа што  публиката одлучува што ќе се гледа и ќе се случува“, раскажува Ризески.   
Претставата ја донесуваат актерите Роберт Ристов, Мирјана Ристов и Дарко Вељиќ. Режијата е на Ѓорѓи Ризески, сценографијата на Роберт Ристов, а костимографијата на Елена Лука.
Актерот Роберт Ристов, за улогата на Џота во „Првин ќе ме земеш после ќе ме…” е добитник на наградата од меѓународното жири на НЕТА за најдобра машка улога на фестивалот „Ристо Шишков”- Струмица.