Жителите на улицата „Богомилска“ веќе три дена и покрај пријавениот дефект во „Нискоградба“, не ја добиле бараната интервенција. Поради пукната цевка, постојано тече вода долж улицата. Еден граѓанин кој живее во близина на дефектот ни се пожали дека водата веќе почнала да ја нагризува и фасадата на неговата куќа. Тој вели: „Крајно време е да се интервенира. Дефектот е уредно пријавен во „Нискоградба“ веќе три дена, а екипи сеуште не дошле да го санираат дефектот.“ Стапивме во контакт со надлежните служби во ЈП „Нискоградба“. Тие ни кажаа дека немаат информации за таков дефект, но дека ќе отидат на лице место за да го испитаат наводниот дефект. Откако биле испратени екипи на лице место, добивме потврда од „Нискоградба“ дека се работи за пукната цевка која е во близина на канализациона шахта во која се прелева водата која истекува од цевката. На прашањето зошто веќе три дена не била испратена екипа на овој дефект, од „Нискоградба“ ни рекоа дека во моментот се соочуваат со огромен број на интервенции и дека е апсолутно невозможно да се интервенира секаде. Сепак добивме потврда дека во најкраток можен рок односно најдоцна до задутре овој дефект ќе биде саниран.
И покрај тоа што дефектот ќе биде отстранет, неодминливо се наметнува прашањето дали и кога Охрид ќе успее да се справи со редовната преоптовареност на водоводната мрежа во летниот период.
{loadposition content9}
