Петков – „човекот амфибија“ постави нов светски рекорд во Охридско Езеро

Јане Петков од Петрич,  Бугарија, познат како „човекот амфибија“ денеска во Охридското езеро постави нов светски рекорд во пливање врзан со ланци и во вреќа. Со оваа несекојдневна атракција Петков по втор пат ќе се запише во Гинисовата книга на рекорди а со тоа и Охридското Езеро во чии води за прв пат го постави рекордот во 2013 година.  

„Многу добро се чувствувам . Среќен сум што сите заедно успеавме да го подобриме рекородот. Ова е значаен датум за Охрид и за Петрич. Немав поголеми проблеми. Освен студената вода и брановите поради кои ми се наруши дишењето на дел од патеката, немав други проблеми. „ – изјави Петков.

Денеска Петков го подобри сопствениот рекорд кој во Охридското езеро го постави пред 5 години и истовремено го сруши актуелниот светски рекорд во оваа дисиплина кој го постави  индиецот Гопал Карви.  64 годишниот  Петков денеска успеа да исплива 3380 метри од плажата Горица 3 до Охрид на кејот што е за 300 метри повеќе од индиецот.

„ Патеката ја исплива , не можам точно да прецизирам , но стартуваше во 9:36 минути а пристигна во 12:36 минути, значи за околу 3 часа. Тоа ќе го имаме официјално во записникот. Со ова Јане го постави новиот светски рекорд во препливување врзан.“ – Кажа Сашо Точков -Прет. ОО Црвен Крст Охрид.  

Покрај љубопитните граѓани и туристи кои со аплауз го пречекаа Петков на кејот, подвигот го следеше и Градоначалникот на општина Петрич Бугарија, Димитар Брчков.

„Огромна благодарност до општина Охрид и на господинот Сашо Точков како претседател на Црвен Крст кој ја направи целосната организација и логистика за овој настан и на сите кои беа вклучени. Се покажа дека кога ќе работиме тимски успехот е неминовен. Се чувствуваме добредојдени во Охрид.“ – изјави Брчков.

Јане Петков се подготвува за нов подвиг. Планира да постави светски рекорд во друг стил, најдолга штафета во пливање под вода. Вели дека што и да прави секогаш Охрид го носи во себе како духовен центар.