ОК ВМРО ДПМНЕ: Градоначалникот лично да им го објасни на граѓаните режимот на сообраќај

Општина Охрид не оди кон светла иднина, нема јасна цел и стратегија. СДСМ не води транспарантен процес на донесување одлуки почитувајќи ги интересите на граѓаните, обвинија денеска на прес конференција од Ок на ВМРО ДПМНЕ. Ова ли е отворена и услужна Општина за сите, којашто ја ветувавте господине градоначалник Стојаноски?, праша портпаролот на огранокот Перчо Божиновски.

„Свесно манипулирате со граѓаните дека претходно била проверена микро-студијата за сообраќај во централното градско подрачје. Лажно се затскривате зад статусот на Охрид под УНЕСКО за кој лично за жал не можете да го гарантирате поради урбанистичките планови и најпосле дрско и безобразно лажете дека жителите барале таков режим на сообраќај.“-Перчо Божиновски- портпарол ОК на ВМРО ДПМНЕ

На жителите од Центар и Стар Град им ветувавте катна гаража, пешачки и велосипедски  патеки, мини плоштад, а не рампи, кажа Божиновски. Од ВМРО ДПМНЕ сметаат дека охриѓани и туристите ги почитувале сообраќајните правила и прописи но го гледале хаосот којшто се случува во сообраќајот и затоа реагираат.

„Уште колку долго ќе молчете пред граѓаните? Преземете одговорност, излезете лично Вие пред охриѓани и објаснете го режимот на сообраќај за време на туристичката сезона како и функционирањето на рампите.“

ВМРО-ДПМНЕ бара градоначалникот Стојаноски веднаш да го поништи донесеното решение за функционирање на рампите а СВР Охрид да ги отстрани, како што велат, незаконски поставените рампи.