Охриѓани денес непријатно разбудени од сон

Охриѓани денес непријатно разбудени од сон. Во четири часот земјотресот со јачина од 6.4 степени според Европската макросеизмичка скала кој ја погоди соседна Албанија и се почувствува во целиот регион ги вознемири граѓаните на Охрид.
Не вознемири зошто два пати тресеше, првиот пат послабо, а вториот пат многу силно, вели еден граѓанин.
Секој жив човек ќе се исплаши од таа работа, поготово оние кои се во високите згради, додава друг.
Моментално сум во стан и не ме вознемири зошто не ми е прв пат, кажува еден охриѓанец.
Во 3.56 ме разбуди, ме вознемири и слегов долу пред зграда, вознемирено раскажува еден сограѓанин.
Многу не вознемири, господ да ни е напомош, вели една охриѓанка.
Силниот потрес ги потсети охриѓани на серијата земјотреси кои го зафатија градов летото 2017, а најјакиот од нив беше 5.1 степен. Тоа лето буквално се живееше во страв од нов земјотрес, а граѓаните стравуваат и сега да не има нови потреси.
Ова е такво подрачје, мора да има нови потреси. Природа е тоа. И да се повтори ништо не се менува. Не можеме да го измениме ние тоа, велат граѓаните.
Според информациите на Институтот за сеизмологија, во регионот на Охрид, Струга и Дебар, земјотресот бил почувствуван со јачина од 5 степени спорд Европската макросеизмичка скала, додека во Кичево истиот бил регистриран со јачина од 4 степени. Како што информираат од Центарот за управување со кризи, засега нема пријави од граѓани за евентуални штети предизвикани од земјотресот во Охридскиот регион и околината.