Од утре започнува имунизација против сезонски грип со комерцијални вакцини

Од утре започнува имунизација против сезонски грип, но со комерцијални вакцини. Цената на вакцината е 650 денари и е од француско потекло и е четворовалентна и со висок квалитет. Вакцинирањето ќе се врши од 8 до 14 часот. Бесплатното вакцирање ќе започне од 25 Ноември. Право на имунизација против сезонски грип без надомест имаат лица над 65 год., лица со хронични заболувања, бремени жени и здравствени работници и деца на возраст од 6месеци до 5 години. Сите тие мора да имаат упат од матичниот лекар со назначен термин за вакцинирање. Оваа вакцина е обезбедена од Министерството за здравство и е од холандски производител. И таа е четиривалентна и високо квалитетна.

Ние како Центар за јавно здравје ја вршиме апликацијата на вакцината, а матичните лекари се оние кои го даваат соодветниот упат на кој ќе биде назначен терминот за вакцинирање. Неофицијално од утре ќе почнат да се отвораат термини и матичните лекари ќе можат да даваат упати, вели Сашо Точков- директор на ЦЗЈЗ.

Бесплатни вакцини има 2400 дози од кои 1350 се за Охрид, 800 за Струга и 350 за Дебар. Од комерцијалните вакцини има 2000 дози. Имунизацијата во однос на минатите години се врши подоцна, а причина за тоа се временските услови и сеуште високите температури.

Стручните лица кажуваат дека не е доцна за започнувањето со вакцинирање против сезонски грип бидејќи грипот се јавува најчесто во втората половина на месец декември, во јануари зема замав, а во февруари е пикот на ова заразно заболување. Десет до петнаесет дена е периодот потребен да се создадат антитела и да има ефект имунизацијата, вели Точков.

Интерес кај граѓаните за вакцинирање против сезонски грип има. Веќе е започнато да се прават списоци. Од Центарот за јавно здравје информираат и дека за сите оние лица кои не се подвижни или од други причини неможат да дојдат во центарот и да се вакцинираат, екипи ќе одат во нивните домови и ќе ги имунизираат. Оние кои нема да се вакцинираат комерцијално мора да имаат упат од матичен лекар.