Со нови сили за нови победи, нестрпливо се очекува стартот на новата суперлига. Подготвителниот период е зад градскиот ракометен клуб Охрид во кој одиграа 6 натпревари преку кои играчите влегоа во задоволителна форма. Оваа година играчкиот кадар е освежен со ракометари кои веќе имаат забележително искуство во македонскиот ракомет. Нови лица во нашиот клуб се Шилегов, голманот Блажески, српското дуо Стефан Додиќ и Алекса Милошевиќ.
Со доаѓањето на Стефан Додиќ, имавме среќа да донесеме еден таков играч, јас сум задоволен како тренер, а мислам и управата. И останатите се истотака млади, но искусни некои биле и интернационалци и тој квалитет треба да го покажиме на терен и сигурен сум дека имаме една млада и компактна екипа – изјави за ТВМ, тренерот на ГРК Охрид, Раде Стојановиќ.
Во суперлигата од првото коло ќе настапуваат и досега привилегираните Вардар и Еурофарм Пелистер. Покрај нив тука се стандардно добрите Металург, Бутел и Пролет. Големи изненадувања се очекуваат од вториот тим на Еурофарм Пелистер и првиот противник на охриѓани, екипата на Тиквеш. Ако минатата сезона оценка беше дека македонскиот плејоф е најсилно натпреварување на бившите простори оваа година е направен уште еден чекор напред бидејќи многу екипи имаат изедначен квалитет.
Ја пречекуваме екипата на ГРК Тиквеш, екипа која се засили оваа сезона и е еден респектабилен противник. За време на подготвителниот период изигравме еден пријателски натпревар и успеавме да издвојуваме победа. Во четврток се надевам дека ќе одиграме еден добар натпревар и повторно ќе се радуваме на победа.“ – изјави капитенот Крсте Андоновски.
Уште една предност за охридските гладијатори е што публиката конечно се враќа на трибините. Според ковид протоколите дозволен е влез во спортската сала „Билјанини Извори“ на одреден број гледачи кои покрај влезница од 100 денари треба да поседуваат и ковид сертификат за присуство на организирани настани согласно здравствените мерки. Новата авантура на охридскиот ракометен клуб започнува во четврток во 18 часот и 30 минути.
