Нема откажувања на туристичките аранжмани за Грција во охридските агенции

Нема откажувања на туристичките аранжмани за Грција во контекст на актуелните случувања кај нашиот сосед.

Додека очите на Европската Унија се вперени кон оваа земја, во екот на летната туристичка сезона, во некои од медиумите се пренесува слика на граѓани кои брзаат да ги повлечат своите парични средства од банките, а проструи и информацијата дека во Грција има недостаток на гориво, како и тоа дека се лимитирани износите на средства кои може да се повлечат од банкоматите. Според дел од туристичките агенции од Охрид кои на клиентите им нудат аранжмани во Грција, оваа ситуација е пренагласена од медиумите. Потенцираат дека имаат позитивни повратни информации од клиентите кои во моментот летуваат таму.

„Нема откажувања на аранжмани, се е во ред. Онака како што би требало да течат аранжманите како секоја сезона. Од контактите што ги имавме со клиенти кои се веќе таму, ги прашавме каква е ситуацијата, ни рекоа дека се е во најдобар ред, и посочија дека нема причина за загриженост, туку напротив велат дека добро си поминуваат.“-вели Драгана Ристевска од туристичката агенција „Венус Травел“-Охрид.

Дека нема никакви откажувања на туристичките аранжмани за Грција ни потврдија и од туристичката агенција „Елида Турс“. Од таму велат дека до овој момент сите аранжмани кои биле букирани за таму се реализираат по нормален тек.

Од туристичката агенција Макс Травел со идентична информација. Од таму велат и дека добиле известување од грчкото министерство за економија во кое се вели дека ситуацијата е нормална, како и тоа дека во земјата има залихи на гориво за наредните седум месеци. Дополнително во известувањето на грчкото министерство за економија се потенцира дека рестрикцијата за повлекување на пари од банкоматите исклучиво се однесува на грчките државјани, а не на туристите. Заменик министерката за туризам Елена Кунтура гарантира дека сите туристи кои ќе престојуваат во Грција нема да ги почувствуваат ефектите од последните случувања во државата и ќе можат максимално да уживаат во нивниот одмор.