Љубовта не ги брои хромозомите

Тие се секогаш насмеани, со исти потреби да бидат сакани и прифатени. Потребна им е поголема поддршка од општеството и да бидат признаени како еднакви без дискриминација врз основа на попреченост. Лицата со Даунов синдром неизмерно и несебично ја даруваат својата љубов. Денес на 21 март Светскиот ден на лицата со Даунов синдром барем за миг треба да се запрашаме дали правиме доволно како поединци и општество за нив.

Нашата сограѓанка Анастазија е весело и комуникативно дете, сака музика, зборува шпански, не се плаши од вода, го сака езерото. Секогаш е насмеана и ведра. Не бега од обврски, ги исполнува со задоволство. Сака да помага и да се чувствува корисна. Најмногу од се`, сака да биде како сите други деца. Анастазија има Даунов синдром.

Најголема поддршка и најсигурна средина и е нејзиното семејство кое неизмерно ја сака. Нејзината мајка Јелена Жупан вели „кога ќе се роди дете со Даунов синдром семејството станува семејство со посебни потреби“. Но додава дека се труди секогаш да ги гледа работите од посветлата страна. Тоа се деца кои можат да ве изненадат на најнеочекуван начин и да ве направат горд родител.

Поддршката од пошироката заедница за овие лица и нивните семејства е неопходна со цел да му се овозможи на детето да оствари социјална интеракција и надвор од семејниот круг. Децата со Даунов синдром можат и треба да бидат вклучени во предучилишни установи, во образовниот процес во редовна настава дури и да бидат вработени. Жупан вели дека токму образованието, покрај здравството, е најболната точка. Заложбите на државата за вклученост на овие деца во редовната настава се само декларативни. Докторите пак сметаат дека децата до Даунов синдром треба што повеќе да се вклучуваат во образованието, во игра и интеракција со другите деца. Жупан вели дека можностите за продолжување на школувањето на лицата со попреченост и можностите за нивно вработување, кај нас, се исклучително мали. За тоа не постои стратегија. Кај нас овие граѓани се оставени исклучиво на грижата и жртвата на нивните семејства.

Денес кога се одбележува Светскиот ден на лицата со Даунов синдром, 21 Март – симболично одбран датум поради трите копии на 21от хромозом (трисомија 21) што се присутни во клетките на лицата со оваа состојба, дадете поддршка во нивната борба за интеграција во општеството. Облечете шарени или различни чорапи за да покажете дека сте свесни за нив. Тие се тука, ретки се и убави, затоа што секој живот е скапоцен. Шарени чорапи денес облекоа и жените од Лајонс клубот „Деница“ чија членка е и Јелена Жупан, гордата мајка на Анастазија.

{loadposition content9}