Жителите на Горно Лакочереј конечно добија вода за пиење

Жителите на Горно Лакочереј конечно добија вода за пиење. После речиси три години голгота, низ нивните чешми потече течноста што живот значи. 176 домаќинства, колку што има во ова село сега се приклучени на градскиот водовод. Синоќа кога потекла водата низ славините за нив било вистински празник, вели Климе Тренески, претседателот на МЗ Горно Лакочереј.

Тренески потсетува дека овој проблем започнал откога биле исклучени од водоводот од кој се снабдувале, а е во сопственост на Емо. Мештаните години наназад барале решение за нивниот голем проблем, па дури самоиницијативно направиле и бушотина. Но, водата не била добра за пиење бидејќи била со слаб квалитет. Сега од ЈП „Нискоградба“ е изграден магистрален цевковод  Ф 110мм во должина од 500 метри и изведени се три водоводни чворови заедно со шиберните шахти. Со тоа е поврзан водоводниот систем од Горно Лакочереј со магистралниот цевковод од градскиот водоводен систем. Ова е првата фаза од проектот. Втората фаза ќе е изградба на нов резервар, а третата фаза е промена на уличните водоводни линии. ЈП „Проаква“ пак, ќе треба да направи преприклучување на секое домаќинство на новата водоводна мрежа.

Златко Старкоски, директорот на МЈП „Проаква“ вели дека приклучувањето на Горно Лакочереј на градскиот водовод е дел од програмата на Локалната самоуправа и дека допрва ќе се реализираат и други вакви проекти.

{loadposition content9}