Богата културна понуда по повод 8-ми септември

Центарот за култура Григор Прличев се подготвува достојно да го одбележи 8-ми септември, денот на независноста на Македонија. Програмата започнува вечерва во 20 часот со отварањето на светската изложба на Битолскиот монмартр. Директорката на центарот, Драгана Боцевска вели дека соработката со оваа ликовна колонија е од многу одамна па затоа одлучиле чествувањето по повод овој голем државен празник да го почнат токму со нивната изложба. Нејзина идеа е делата на малите уметници од светот барем еднаш годишно да бидат ставени пред очите на охридската јавност. Боцевска кажува дека веќе станува нивна пракса со богата програма да ги одбележуваат сите поголеми, било национални било локални празници.

Утре во 18 часот писателот Мирко Томовски ќе одржи трибина на која ќе даде еден историски осврт на настаните околу македонското прашање, а во 19 часот на платото пред Центарот за култура ќе настапат ансамблите Бисери, Филиграни, Отекс и естрадниот уметник Петар Нечовски.

Покрај овие настани кои центарот ги организира по повод престојниот празник во тек се и подготовките за новата кино сезона. Таа започнува на 19-ти со семејниот филм Огледлце, огледалце по што во октомври се очекува да пристигне филмот Трето полувреме. И театарот работи со полна пареа. На крајот на месецов, поточно на 29 септември ќе се игра преставата Итар пејо, а се подготвува и премиерата на Малограѓанска свадба на режисерот Дејан Пројковски која охриѓани по се изгледа ќе можат да ја видат во октомври.

{loadposition content9}