Казна му е мајката

Просторот помеѓу улиците „Коста Абраш“ и „Цар Самоил“ повторно преполн со паркирани возила. Оваа спојка подолг период претставува проблем за жителите на Стар град кои честопати не можат да си појдат дома, бидејќи просторот е блокиран од паркираните автомобили. Уште пред три години Телевизија ТВМ го актуелизираше овој проблем, но сеуште никој не го реши. Уште тогаш од Секторот за комунални дејности, сообраќај и улици во локалната самоуправа беа поставени два знаци за забрането запирање и паркирање и од едната и од другата страна на спојката непосредно до ресторанот Чун, меѓутоа, очигледно несовесните возачи не ги почитуваат.
Во случаите кога се прекршуваат сообраќајни знаци, обврската за постапување е во рацете на сообраќајната полиција. СВР Охрид во неколку наврати не информираше дека на тој простор забележале непочитување на сообраќаните правила од некои учесници во сообраќајот и дека проблемот го решаваат со изрекување на усни и писмени опомени, но без изрекување на казни. Но се чини дека предупредувањата на СВР немаат ефект врз возачите, бидејќи овој простор повторно е полн со паркирани автомобили. Имајќи предвид дека доаѓа летниов период па се почесто овој простор ќе биде запоседнат од нелегално и непрописно паркирани автомобили, можеби е време, од Секторот за внатрешни работи од Охрид да пристапат и кон казнување на прекршителите и нивно парично санкционирање. Можеби тогаш, оваа мала спојка, но значајна за оние кои живеат во Стариот дел на градот, но и за туристите кои во летниот период престојуваат во овој дел, ќе биде слободна за движење, а не блокирана со автомобили.