Изборите поминаа, минарето се гради

Од Здружението „Совест“ алармираат  дека и покрај најавите за престанување со градежни работи на минарето на Али Пашината џамија во Охрид, тоа сепак се гради. По краткото затишје за време на изборите , од здружението велат дека се крева нов кат на минарето. На социјалните мрежи објавија фотографија направена денес, на која се гледа дека продолжуваат градежните работи.

“Поминаа изборите и веќе си тераaт по старо. Еве денес, 08.05.2019 година се подготовува нов спрат нa минарето на дивоградбата Aлипашина џамија. Правда? Закон? Жолт картон? Дали е разбрана пораката? Почитувани, 5-ти мај помина, Охрид нема време да чека,“ порачаа од „Совест“.

Додават дека довербата повторно е дадена, а жолтиот картон веќе го испорачале.
„ Не дозволувајте да не изиграте, зошто следен е црвен.“- порачуваат од „Совест“

Премиерот Зоран Заев, пред изборите, во Охрид изјави  дека решение за нелегалните градежни активности на Али Пашината џамија ќе се бара после изборите а дека до тогаш нема да има никакви зафати на објектот. Кажа дека предизборниот период бил сензитивен.  „Одлучивме ова прашање да го разгледаме на заеднички состанок во Владата после 5ти мај и да го изнајдеме решението.“ – изјави премиерот на крајот на март и уште еднаш порача дека законите во државата треба да се почитуваат, но додаде дека решенијата за ваквите проблеми како спорната реконструкција на џамијата и изградбата на 32 метарското минаре треба да се бараат и со меѓусебна почит и разбирање во рамките на религиската разноликост како богатство.

За разлика од премиерот, од Исламската верска заедница во медиумите излегоа со став дека изградбата на 32метарското минаре за ИВЗ е завршена работа и дека компромис за стопирање на изградбата нема да дозволат.

За случајот со Али пашината џамија постапка се води во Основното јавно обвинителство Охрид, кое поднесе кривични пријави против повеќе физички и правни лица кои се товарат дека спротивно на законот и без да обезбедат соодветно одобрение за градба отпочнале активности на објектот.