Итен налог за рушење

Укажувањата на бројните проблеми во градов од страна на медиумите како коректор на власта и надлежните, минимизирани. Нашите настојувања да добиеме одговор од надлежните кога ќе се случи фамозното рушење на опасните по живот градби или ќе вроди со конкретен резултат на терен, или ќе испадне како во народната поговорка – „Помина зимата фрли ја гуната“. Овој проблем веќе години наназад се провлекува низ општинските лавиринти.

Раководителот на Секторот на урбанизам Бранко Арнаудов сеуште молчи иако добро му е познато за што станува збор. Нашите напори да стапиме со него во контакт се речиси невозможни. Во негово име градоначалникот Александар Петрески рече дека овој проблем веќе е во процедура и за 15 дена се очекува акција на терен. Дека е така потврди и раководителот на општинскиот инспекторат Танас Танасоски. Тој кажа дека веќе е изготвен списокот на 16 опасни градби на кои под итно треба да се делува, но дека сеуште ги немаат добиено решенијата за рушење кои треба да ги даде секторот за урбанизам.
Танасоски смета дека овојпат нема бегање од постапката за отстранување на објектите кои се опасни по безбедноста на граѓаните. Тој рече дека и градоначалникот сериозно го сфатил проблемот бидејќи издал итен налог за рушење. Танасоски дециден дека постапката за рушење не е евтина.
Изминативе години според изјавите на надлежните за овој проблем се чекаше некоја лиценцирана фирма од Скопје да дојде и да ги отстрани опасните градби. Но, во Охрид веќе има лиценцирана фирма за рушење на ваков вид градби, која најверојатно по пат на тендер ќе биде избрана за побрзо да делува, вели Танасоски. ТВМ во неколку наврати во интерес на јавноста, пишуваше за вакви опасни градби, посебно на ул. „Богомилска“, во Даљан во непосредна близина на ОУ Св. Климент Охридски и други места, досега без конкретен резултат.

{loadposition content9}