Родителите бараат повеќе да се води сметка за хигиената во училиштата

Хигиената во тоалетите во средното економско училиште е на незавидно ниво. Нема ниту течен сапун, ниту пак друго средство за хигиена, а сега е сезона на грип па препорака од СЗО е што почесто да се мијат рацете, се вели во реакцијата на еден родител чие дете учи во овај образовен центар. Тој побара сериозно да се разгледа ова прашање и што поскоро да се најде решение. Директорот на економското училиште, Наум Рилкоски, се согласува со забелешките на родителите. Но, вели дека една од причините за ваквата ситуација е што средствата од блок дотациите кои ги добиваат од државата се толку мали што речиси и да не останува за оваа намена. Тој додава дека надоместуваат со пари од општината за да купат средства за хигиена и тврди дека секој први во месецот се набавуваат вакви средства.

Рилкоски потенцира дека се соочуваат и со уште еден проблем. Тоа е што недостасува персонал, конкретно хигиеничари кои би можеле да ја одржуваат хигиената на потребното ниво.

Тој кажува дека во сите образовни институции во градов, а тука спаѓаат основните и средните училишта како и градинките и основното музичко училиште редовно се врши дезинфекција и дератизација бидејќи тоа е и нивна законска обврска. Конкретно во економското училиште и во гимназиската зграда пред две недели се извршиле вакви зафати. Рилкоски ветува дека во иднина уште повеќе ќе се води сметка за хигиената во училиштата, но апелира до учениците и тие да бидат  поодговорни пред се за сопственото здравје, а со своето однесување да придонесуваат за што почисти училишта.

{loadposition content9}