„Изминатите две години започнавме со реализација на нашата амбициозна програма, со која значително ги подобривме условите за настава во сите училишта и успеавме да го подигнеме образованието во Охрид на едно повисоко ниво, кажа на денешниот прес Константин Георгиески кој ја бара довербата на охриѓани за втор мандат. Охрид е град на Свети Климент, град на писменоста и заслужува да ги носи овие епитети“, посочи Георгиески.
Нашите деца и внуци, ГОДИНИ и ДЕЦЕНИИ наназад учеа во училници во кои имаше провев од сите страни, во кои прокиснуваа таваните, подовите се распаѓаа, а наставата се одвиваше во објекти, во кои немаше инвестирано ни еден денар. Преку посветена работа и голем ангажман, значително ја променивме таа пракса. Поставени се нови покриви на 5 училишни објекти, инвестирано е во нови фасади, нова дограма, извршена е промена на подови, реконструкција на тавани, ѕидови и санитарни јазли – наброја Георгиески.
Денешниот изглед на ОЕМУЦ „Свети Наум Охридски“ е еден пример за нашата работа, каде што се извршени низа инвестиции и изградена е нова спортска сала, по сите современи стандарди, посочи Георгиески. Порача дека цел им е Охрид да биде град со најдобар стандард за образование во државата и најави продолжување со инвестиции во сите училишта.
Работиме според приоритетните потреби и обезбедуваме реконструкција на објектите и набавка на училишна опрема за сите основни и средни училишта. Создаваме услови за воспитување и образование во сите делови на градот, обезбедуваме квалитетно образование достапно за сите. Во претстојниот мандат ПРЕДВИДУВАМЕ изградба на нови објекти на основните училишта „Григор Прличев“ и „Братство Единство“, комлетна реконструкција на гимназијата „Свети Климент Охридски“, проекти за поддршка на дуалното образование, иницијатива за отворање на нови паралелки во медицинските струки и многу други инвестиции – најави Георгиески.
„Како власт, покажавме дека НИЕ нема потреба да ГАРАНТИРАМЕ, затоа што ние РЕАЛИЗИРАМЕ. Нашето „ЌЕ“ се гледа на ДЕЛО“ – кажа Георгиески и додаде дека граѓаните тоа го гледаат и умеат да направат разлика.
