Еуроњуз со сторија за историските богатства на Охрид

Познатиот информативен сервис Euronews во својата културна рубрика со сторија за нашиот Охрид. Репортажата, освен фантастичните снимки од нашиот град, вклучува и стручни коментари на неколку експерти од областа на историја на уметност, реставратори и туристички водичи како Милчо Ѓеоргиевски, Владо Муковски и Андријана Башоска.

Во репортажата се зборува за историјата на градот почнувајќи од времето кога го носел името Лихнидос или Град на светлината. Во неа место пронајдоа и бројните археолошки пронајдоци со кои изобилува Охрид. Со особен интерес репортерката на Euronews Катарина Каун раскажува за пронаоѓањето на римската бања која според историчарот на уметност Милчо Ѓеоргиевски е вистинска реткост бидејќи потекнува од 1от век од нашата ера. Репортерката Каун со воодушевување зборува за легендата за 365те цркви по една за секој ден од годината, а дел од нив вели таа, сеуште стојат околу езерото.  Охрид е опишан како центар на византиската култура, а како најзначаен примерок од истата е спомената катедралната црква Света Софија. Збор-два има и за големите учители Свети Климент и Наум кои се опишани како луѓето кои ја прошириле словенската литература, култура, песна и уметност на Балканот и Европа.

Инаку оваа репортажа е дел од серијалот наречен Macedonian life. Во наредната епизода од истиот, Euronews ќе ги посети кањонот Матка и нејзините мистични пештери како и Дојранското езеро.

{loadposition content9}