„Едно капаче – Една надеж“

„Едно капаче – Една надеж“. Еколошиот одбор, сите вработени и ученици од ОУ „Ванчо Николески“ од Лескоец заедно со подрачните училишта во Куратица, Ливоишта и Косел се придружија кон оваа хуманитарна акција која ја иницираше Македонска Медицинската студентска асоцијација. Треба да се соберат 250 килограми капачиња кои ќе бидат испратени во Турција и кои ќе бидат рециклирани. За возврат се добива една инвалидска количка која ќе биде донирана на семејство кое има потреба од истата, а нема финансиска можност самостојно да ја обезбеди. Учениците од овие училишта сесрдно ја прифатија акцијата и веќе две недели секојдневно собираат капачиња.

Јас донесов десет капачиња, а ма ќе носам и понатаму. И моите другарчиња секој ден носат капачиња и ги ставаат во кутијата, вели еден петоодделенец.

Јас многу сакам хуманитарни акции и секогаш учествувам во нив. Сакам да помагам и дабидам хуман, вели неговиот другар.

Од ОУ „Ванчо Николески“ велат дека нивното училиште ја негува хуманоста и секогаш кога има можност се приклучува или самото организира хуманитарни акции. Ги повикуваат сите граѓани и ученици на Охрид да се приклучат кон оваа иницијатива. Засега ова училиште е првото во општина Охрид во кое се спроведува оваа акција.

И колегите и учениците беа навремено известени за акцијата и сите со воодушевување и со радост ја прифатија и се приклучија затоа што целта е повисока. Покрај што има хумана димензија има и еколошка бидејќи покрај капачињата ќе ги собираме и шишињата кои ќе ги дадеме во отпад за рециклирање, вели Жаклина Трипунова -директорка на ОУ „Ванчо Николески“

Директорката кажува дека акцијата се повеќе се интензивира и дека за брзо ќе ја соберат потребната количина. Капачињата се собираат во кутија која е поставена на влезот на училиштето.