Донев: Кабинетот на Георгиески претворен во КОВИД-тим со незаконски договори нè чини фантастични 190.000 ден. месечно

Донев рече дека со желба да ги вдоми партиските послушници на СДСМ, Градоначалникот склучил четири незаконски договори кои се недозволени во таа форма и истите се со нејасни цели и фиктивни работни задачи.

Кабинетот на Георгиески претворен во КОВИД-тим со незаконски договори нè чини фантастични 190.000 ден. месечно, обвини денеска на прес конференција претседателот на ОК на ВМРО ДПМНЕ, Сашо Донев. Донев рече дека со желба да ги вдоми партиските послушници на СДСМ, Градоначалникот склучил четири незаконски договори кои се недозволени во таа форма и истите се со нејасни цели и фиктивни работни задачи.

„Ангажирани лица според договорите се најблиските соработници од кабинетот на градоначалникот. Правен консултант од кабинетот на Георгиески и координатор на Општинскиот кризен штаб за заштита на населението од КОВИД-19 за својот ангажман ќе добива фантастични 60.000,00 денари плус да му биде платен и персоналниот данок. За споредба толкава плата не добива ни Директорот на Општата болница.“ – кажа Донев.

Според Донев, економски консултант од кабинетот на Георгиески за справување со економските последици од коронавирусот за својата работа ќе добива 40.000,00 денари плус платен персонален данок, исто толку ќе добива и консултантот во кабинетот, давател на интелектуални услуги за намалување на негативните економски последици од КОВИД-19 а 30.000,00 денари плус данок ќе добива вршителот на инетелктуални работи во Општината, за потребите на кризниот штаб како дел од кабинетот на Георгиески задолжен за односи со јавност.

„Ги повикуваме стручните служби на општина Охрид веднаш да ги прекинат исплатите по овие договори затоа што и тие знаат дека се незаконски и дека еден ден ќе има одговорност за ова! Ние ќе ја известиме Антикорупциска комисија за ова беззаконие, а очекуваме и ОЈО Охрид по допрен глас да отвори истражна постапка за ваквите договори.“- рече Донев.

Донев додаде дека  има чесни и посветени вработени во администрацијата на локалната самоуправа и во јавните претпријатија кои секојдневно посветено работат со цел системот да функционира, а се минимално платени за својот труд.