Два пожари за два дена

Поради човечко невнимание, два пожари за два дена. Денес околу 12 часот, приметен е пожар во близина на селото Влегошти, кај црквата Св. Илија. Командирот на противпожарната единица, Спасе Прентоски не информира дека пожарот навреме е ставен под контрола и дека нема опасност од ширење. Нивните екипи први стигнале на местото на пожарот, а потоа и екипи на Националниот парк Галичица и Шумско стопанство. Од охридската противпожарна единица, на терен се со две возила и осум пожарникари. Прентоски информира дека штетата дополнително ќе се утврдува.

A во вчерашниот пожар кој избувна во близина на селото Лакочереј, во месноста наречена „Дебело Поле“ опожарени се триесеттина хектари површина на сува, ниска вегетација, трска, а целосно се уништени и голем број гнезда на дивите птици кои живеат во овој предел. Вчерашниот пожар бил подметнат од страна на несовесни граѓани, а од противпожарната единица апелираат да не се палат стрништата, поради што најчесто се иницираат и пожарите од ваков вид. Инаку во вчерашното гаснење на пожарот  биле вклучени три противпожарни возила и десетина пожарникари. Од почетокот на годината до сега, а од страна на екипите на Противпожарната единица за овие два и пол месеци извршени се над 80 интервенции.

{loadposition content9}