Центарот за безбедност на вода да се сфати сериозно

Општинската организација на Црвен крст и по седум години не најде слух и разбирање кај надлежните органи за да обезбедат локација за функционирање на Центарот за безбедност на вода. Огромната езерска површина на која во летниот период се разладуваат  бројни капачи и пловат бродови, кајчина и глисери   налага да постои еден ваков Центар кој би бил лоциран на самиот езерски брег. Во него би биле сместени спасители, чамци и опрема за брзо делување во ризични ситуации, истакнува Сашо Точков, претседател на  Црвен крст-Охрид.

Црвен крст постојано добива опрема за опремување  на центар, а ја донираат странските организации. Годинава добиле два гумени чамци за спасување на вода од англискиот центар Флоријан. Опремиле и брод амбуланта во соработка со Локалната самоуправа. Сега опремата стои во магацин и во каналот затоа што нема соодветна локација, укажува Точков. Тој апелира до надлежните институции сериозно да ја сфатат потребата од функционирање на овој центар.  „Несовесност е кога луѓето кои го користат езерото се оставени на случајност сами да се грижат за безбедноста. Не е доволно  само до постојат спасители на вода туку центар за координација и делување, а не да биде се импровизација“, вели Точков.

Црвен крст од Охрид за решавање на овој проблем се обрати и минатата година до Локалната самоуправа и Министерството за транспорт и врски, но без конкретен одговор. Оваа вообичаена безбедносна пракса на сите поголеми и помали водени површини во светот кај нас доцни. На запад, ваквите  центри одамна функционираат и  не може да се замисли капалиште, рекреација и спортување без негово постоење, појаснува Точков.

{loadposition content9}