Гарантираме добри инфраструктурни, водоснабдителни и канализациони системски решенија кои обезбедуваат континуиран развој на Општина Охрид и паралелно со уредувањето и грижата за јавното зеленило директно придонесуваат за почиста и поздрава животна средина за сите, кажа на денешната прес конференција Перчо Божиновски, кандидат за советник и портпарол на ОК ВМРО-ДПМНЕ Охрид.
Божиновски наброја неколку проекти од сферата на комуналната инфраструктура од програмата на Коалицијата За обнова на Македонија.
Гарантираме: РЕКОНСТРУКЦИЈА И ИЗГРАДБА НА КАНАЛИЗАЦИОНИОТ СИСТЕМ. Проектот предвидува изградба или доизградба на канализационен систем во населба „Гоце Делчев“ – Бараки, село Долно и Горно Лакочереј, село Подмоље, село Трпејца како и во сите населени места каде што има потреба од истата. Се обврзуваме за:ИЗГРАДБА НА АТМОСФЕРСКА КАНАЛИЗАЦИЈА НИЗ ОПШТИНА ОХРИД. Атмосферска канализација на територија на општина Охрид. Целта е унапредување и заштита на животната средина, подобрување на условите во делот на уличната инфраструктура – истакна Божиновски.
Кандидатот за советник Божиновски упати критика до СДСМ и Георгиески дека улици низ Охрид по краткотраен дожд биле поплавени, обвинувајќи дека локалната власт работела неодговорно и со импровизации.
Ако ваквото функционирање е најдоброто за нашата општина тогаш како ли е најлошото? Со оваа власт реконструкцијата на улиците оди бавно, неквалитетно и селективно. Георгиески да одговори по кој критериум се врши асфалтирањето? Дали сето тоа е само предизборен маркетинг и популизам? За брзо следува одговорност за нестручноста и непрофесионализмот во изведувањето на активностите – потенцираше Божиновски на денешната прес конференција.
Развиена мрежа на атмосферска канализација е еден од главните услови за превенција од поплавени улици при дождови, потенцира Божиновски и порача дека новото советничко мнозинство и новиот Градоначалник на Општина Охрид од редовите на ВМРО-ДПМНЕ и коалицијата „Обнова на Македонија“ гарантираат квалитетни инфраструктурни, водоснабдителни и канализациони системски решенија.
